ආර්ථික අඳුරෙන් ගොඩ ඒමට - ආර්ථික මූලධර්මයන් උගනිමු. ආර්ථික මිථ්‍යාවන් පිටුදකිමු. ආර්ථිකය කළමනාකරණය කරමු.
ආර්ථිකයක් ක්‍රියාත්මක වන්නේ කෙසේ ද?
- වෙළෙඳපොළක් යනු ඉල්ලුම් සහ සැපයුම් බලවේගයන් මත මිල වෙනස්වීම හරහා ඉල්ලුම් සහ සැපයුම් තුලනය වීමේ ප්‍රවණතාවක් පවතින වෙළෙඳ ක්‍රියාවලිය යි.
- රාජ්‍ය මැදිහත්වීම යනු රාජ්‍ය මූල්‍ය ප්‍රතිපත්තිය සහ මූල්‍ය ප්‍රතිපත්තිය හරහා රජය විසින් විවිධ පරිමාණයෙන් විවිධ වෙළෙඳපොළවල සැපයුම, ඉල්ලුම සහ මිල කෙරෙහි බලපෑම තුළින් වෙළෙඳපොළ පද්ධතිය කෙරෙහි මැදිහත්වීමේ ක්‍රියාවලිය යි. එම ක්‍රියාවලිය පුළුල් වශයෙන් බදු, රාජ්‍ය වියදම්, රාජ්‍ය ණය, රාජ්‍ය ව්‍යවසායන් සහ වෙළෙඳපොළ නියාමනයන් හරහා සිදුවෙයි. එය මහජනයාගේ ජීවන සහ සමාජීය සුභසාදනය ඉහළ නැංවීම සඳහා යෝග්‍ය බවට වත්මන් රජය පිළිගන්නා සංකල්පයන් මත සිදු කෙරේ. සාර්ව ආර්ථික කළමනාකරණය ලෙස හැඳින්වෙන්නේ මෙම රාජ්‍ය මැදිහත්වීමේ ක්‍රියාවලිය යි.
2022 ශ්‍රී ලංකා ආර්ථික අර්බුදය ද එවැනි දාම පුරුක් බිඳී යාමකි. වර්තමානයේ දී අප සියළු දෙනා විවිධාකාර ජීවන ගැටළුවලට මුහුණ දීමට හේතුව එය යි. සාර්ව ආර්ථික කළමනාකරණයේ හුදු අරමුණ වනුයේ එවැනි කම්පනයන් වලක්වා ආර්ථිකය ස්ථායීව පවත්වා ගෙන යාම යි.
එබැවින්, ඕනෑම ආර්ථික කම්පනයක් පිළිබඳ ව පොදුජනයා විසින් රජයට දොස් නැගීමේ අසාධාරණයක් නොමැත. එබැවින්, රජය විසින් තම කාර්යය ඉටු නොකොට ඕනෑම ආර්ථික කම්පනයක් පිළිබඳ ව වෙළෙඳපොළවලට හෝ මහජන කොටස්වලට දොස් පැවරීම අසාධාරණය. මෙහි දී, සාර්ව ආර්ථික කළමනාකරණයේ වැරදි ද පොදුජනයා පිටට පවරනු ඇත. එවැනි රජයන් ඉක්මනින් විශ්‍රාම ගැන්වෙන බව සාමාන්‍ය අත්දැකීම යි.
ආර්ථික විද්‍යා විෂය මූලික වශයෙන් වෙළෙඳපොළ පද්ධතිය සහ රාජ්‍ය ආර්ථික මැදිහත්වීම පිළිබඳ ව මූලධර්මයන් මත පදනම් වූ විග්‍රහයන් ඉදිරිපත් කිරීමට සැකසී ඇත. ඕනෑම විෂයක මූලධර්මයන් මූලික වශයෙන් සැබෑ ලොව පවතින සංකීර්ණත්වය ඉවත් කිරීම සඳහා කෙරෙන උපකල්පනයන් මත පදනම් වී ගොඩ නැගී ඇත. ඒ අනුව, ආර්ථික විද්‍යා මූලධර්මයන් මගින් වෙළෙඳපොළ සහ රාජ්‍ය හැසිරීම සහ එහි ආර්ථික ප්‍රතිඵලයන් පිළිබඳ ව උපකල්පනයන් මත පදනම් වූ අනාවැකි හෙවත් න්‍යායන් ඉදිරිපත් කෙරේ.
එබැවින්, ආර්ථිකයක සැබෑ ක්‍රියාකාරිත්වය හඳුනා ගැනීම සහ විග්‍රහ කිරීම හුදෙක් ආර්ථික විද්‍යා මූලධර්මයන් පමණක් මත සිදු කිරීම දෝෂ සහිත වෙයි. ඊට හේතුව, මහජනයාගේ සැබෑ ආර්ථික හැසිරීම සංකීර්ණ වෙළෙඳපොළ සාධකයන් සහ අනේකවිධ රාජ්‍ය මැදිහත්වීම් මධ්‍යයේ තීරණය වන බැවින් උපකල්පනයන් අදාළ නොවීම යි.
එබැවින්, සැබෑ හෙවත් ප්‍රයෝගික විග්‍රහයන් සිදු කෙරෙන විෂය අංශයක් ද ආර්ථික විද්‍යා විග්‍රහයන්හි දැකිය හැකිය. මෙහි දී, එම විග්‍රහයන්ට මූලික ගැටළු දෙකකට මුහුණ දීමට සිදුවෙයි.
- පළමුව, ආර්ථික තුළ පවතින අනේකවිධ රාජ්‍ය මැදිහත්වීම් සහ එහි ප්‍රතිඵල පිළිබඳ දැනුම නොමැතිවීම.
- දෙවනුව, ආර්ථිකයේ විවිධ වෙළෙඳපොළවල සහ රජයේ ක්‍රියාකාරකම් පිළිබඳ දත්ත නොමැතිවීම සහ දැනට පවතින බොහෝ දත්ත රජය විසින් ඒක පාර්ශවීය සපයන දත්ත වීම.
එබැවින්, බොහෝ ශාස්ත්‍රීය ආර්ථික විද්‍යාඥයන් විසින් සිදු කරනු ලබන විග්‍රයහයන් බොහෝ දුරට ආර්ථික විද්‍යා මූලධර්මයන් මත පදනම්වීම දැකිය හැකිය. එහෙත්, රාජ්‍ය අංශය තුළ සේවය කිරීම හරහා රාජ්‍ය මූල්‍ය සහ මූල්‍ය ප්‍රතිපත්ති සම්පාදනයෙහි නියැලී පළපුරුදු විද්වතුන් සතුව බොහෝ ප්‍රයෝගික ආර්ථික දැනුමක් පවතින අතර ශාස්ත්‍රීය විග්‍රහයන්වල පවතින විෂය දෝෂයන් හඳුනා ගැනීමට ඔවුන්ට හැකියාවක් ඇත.
එබැවින්, ආර්ථික විද්‍යාඥයන්ගේ විද්වත්භාවය විය යුත්තේ හුදෙක් මූලධර්මවලට සීමා නොවී, ස්වාධීන ආර්ථික පර්යේෂණ ක්‍රියාවලියක් හරහා ප්‍රයෝගික විග්‍රහයන් ඉදිරිපත් කිරීම යි. ආර්ථික විද්‍යා විෂයේ ස්වරූපය සහ ව්‍යාප්තිය දෙස බලන විට එම විග්‍රහයන් එකිනෙකට සමාන විය යුතු නැත. එහි වැදගත්කම වන්නේ ආර්ථිකයේ සැබෑ ක්‍රියාකාරිත්වය හඳුනා ගැනීමට උපකාරී වන තොරතුරු විවිධ පැතිකඩයන් හරහා ඉදිරිපත් වීම යි.
මා විසින් රචිත ආර්ථික විද්‍යා ග්‍රන්ථයන්හි විෂය පදනම
ශ්‍රී ලංකා මහ බැංකුවට අනුබද්ධව වසර 35 ක පමණ දිගු කාලයක් පුරා විවිධ ක්ෂේත්‍රයන්හි රාජ්‍ය ප්‍රතිපත්ති ක්‍රියාත්මක කිරීම සහ දත්ත රැස්කිරීම සහ විශ්ලේෂණය පිළිබඳ මා සතු අභ්‍යන්තරික දැනුම ඊට මහත් පිටිවහලක් විය. එබැවින්, මා විසින් ඉදිරිපත් කෙරෙන ආර්ථික විග්‍රහයන් සම්ප්‍රදායික ආර්ථික මූලධර්මයන් මත කෙරෙන විග්‍රහයන්ගෙන් සපුරා වෙනස් වන බොහෝ අවස්ථාවන් පවතින බව මෙම පොත් පරිශීලනය කරන පාඨකයන්ට පෙනී යනු ඇත.
ආර්ථික විද්‍යා ගුරු සහ සිසු පරපුරට ආර්ථික හිතකාමී ඔවදනක්
ආර්ථික විද්‍යා ග්‍රන්ථයන් සහ විභාග ප්‍රශ්න පත්‍රයන් දෙස බලන විට ඒවා හුදෙක් සම්ප්‍රදායික ආර්ථික විද්‍යා මූලධර්මයන් පිළිබඳ දැනුම වනපොත් කිරීමට සැකසී ඇති බවට විවාදයක් නොමැත. එබැවින්, ගුරුවරුන් සහ සිසුන් විසින් ආර්ථික සංඛ්‍යාවන් භාවිතා කෙරෙන්නේ ද ආර්ථික විද්‍යා මූලධර්මයන් කෙසේ හෝ සනාථ කිරීම සඳහා ය. ඉන් බැහැර වී සැබෑ වශයෙන් ආර්ථිකයෙහි සිදුවන සිද්ධි මාලාව නිරීක්ෂණය කොට ආර්ථික විද්‍යා මූලධර්මයන් සහ සංඛ්‍යාවන් ප්‍රශ්න කිරීමටත්, ඒ ඒ ආර්ථික සිද්ධි පිළිබඳ ව අභ්‍යන්තරික විග්‍රහයන් කිරීමටත් කිසිවෙකු ඉදිරිපත් නොවේ.
සමහරු විසින් ආර්ථික විද්‍යා මූලධර්මයන් සලකනු ලබන්නේ ආර්ථික දේව ධර්මයක් ලෙස ය. බොහෝ ප්‍රතිපත්ති සම්පාදකයන් විසින් තම ආර්ථික මතයන් ඉදිරිපත් කෙරෙන්නේ ද ඒ ආකාරයෙනි. ආගමික/දේව ඇදහිලිවල මෙන් ඔවුන්ගේ අනුගාමිකයන් ජාලයක් ද විවිධ මාධ්‍යයන් හරහා ප්‍රවර්ධනය කොට ඇත. එබැවින්, සැමගේ මුව පිරි විග්‍රහය වන්නේ සියළු සිද්ධිවලට හේතුව දේශපාලනික නායකයන්ගේ දුෂණය බව යි.
එබැවින්, ගුරුවරුන් සහ සිසුන් ආර්ථික විද්‍යා මූලධර්මයන් පිළිබඳ ව තමන් සතු විස්තීර්ණ දැනුම පසුබිමෙහි තබා ගෙන සැබෑ ලොව ආර්ථික සිද්ධි මාලාව විග්‍රහ කිරීමට පුරුදු පුහුණු වන්නේ නම්, එය වත්මන් ආර්ථික අර්බුදයෙන් පොදුජනයා ගොඩ ගැනීමට ඉමහත් පිටුවහලක් වනු නියතය. ඊට හේතුව, රාජ්‍ය ප්‍රතිපත්ති සම්පාදකයන්ට තමන් හිස මත තබා ගෙන ඇති ආර්ථික මූලධර්මයන් හුවා දක්වමින් නිරන්තරයෙන් මහජනතාව රැවටීමට නොහැකි වන බැවිනි. එමගින්, දැනට කිසිම පොදුජන සේවයක් නොකෙරෙන ආර්ථික විද්‍යාව ඉමහත් පොදුජන සේවයක් කෙරෙන විෂයක් හෝ විද්‍යාවක් බවට නුදුරේ දී පරිවර්තනය කළ හැකි වනු ඇත. මා විසින් රචිත පොත්වල අරමුණ එය යි.
මා විසින් රචිත සරසවි පොත් පෙළ
- මූලික ආර්ථික ප්‍රශ්න සහ විකල්ප විසඳුම් ක්‍රම විග්‍රහය
- මූල්‍ය ආර්ථික විද්‍යාව: මුදල්, වාණිජ බැංකු සහ මහ බැංකුව
- ජාත්‍යන්තර ආර්ථික විද්‍යාව: ගෙවුම් ශේෂය, විදේශ විනිමය සහ ප්‍රතිපත්ති
- ක්‍ෂුද්‍ර ආර්ථික විද්‍යාව: පාරිභෝගික, නිෂ්පාදක සහ වෙළෙඳපොළ හැසිරීම්
- සාර්ව ආර්ථික විද්‍යාව: ජාතික ආදායම සහ උපයෝජනය, සාර්ව ආර්ථික කළමනාකරණය සහ ශ්‍රී ලංකාවේ ආර්ථික ප්‍රවණතාවන්
- 2022 ශ්‍රී ලංකා ආර්ථික අර්බුදය ආර්ථික විද්‍යා ඇසකින්. අර්බුදය වැලැක්වීමටත්, නිරාකරණයටත්, අප අසමත් වූයේ ඇයි? අර්බුදයේ දෙවන වටයට සූදානම් වෙමු ද?
පි සමරසිරි
[ආර්ථික විද්‍යාව බී.ඒ. ගෞරව (කොළඹ විශ්ව විද්‍යාලය) සහ එම්.ඒ. (කැන්සස් විශ්ව විද්‍යාලය)]
Comments
Post a Comment