මහ බැංකු ප්‍රතිපත්ති පොලී අනුපාතයට සාර්ව ආර්ථික විද්‍යා පදනමක් තිබේ ද? නැතහොත් එය තවත් නිලධාරීවාදී පාලන මිලක් ද?
මෙම කෙටි ලිපියේ අරමුණ වනුයේ, නුතන මුදල් ආර්ථිකයන් ක්‍රියාත්මක වන ආර්ථික සහ මූල්‍ය මූලධර්මයන් තුළ මහ බැංකු ප්‍රතිපත්ති පොලී අනුපාතයට මූලධර්මීය පදනමක් නොමැති බවත්, එහෙත්, මහ බැංකු විසින් එය ගතානුගතික නිලධාරීවාදී මෙවලමක් ලෙස භාවිතා කෙරෙන බවත්, එමගින් පොදුජන ආර්ථික ප්‍රවර්ධනයට හෝ ස්ථායිකරණයට මහ බැංකු පවසන තරම් මැජික් දායකත්වයක් හඳුනාගත නොහැකි බවත්, එය ක්‍රියාශීලී ආර්ථිකයන්හි අපේක්ෂණයන් කෙරෙහි බලපාන තවත් වෙළෙඳපොළ විචල්‍යයක් හෝ සාධකයක් පමණක් බවත්, ඉදිරිපත් කිරීම යි. එහෙත්, ආර්ථික විද්‍යා සහ බැංකු විෂය ග්‍රන්ථවල මහ බැංකුව සහ මූල්‍ය ප්‍රතිපත්තිය මාතෘකාව යටතේ මහ බැංකු පොලී අනුපාතය හෙවත් ප්‍රතිපත්ති පොලී අනුපාතය යනු මහ බැංකුවට මනාප ආකාරයට ආර්ථිකය පාලනය කිරීමට හැකි මැජික් පොල්ලක් ලෙස දැක්වෙයි. ඒ අනුව, ආර්ථිකයේ උද්ධමනය පාලනය කිරීම මෙන්ම වර්ධනය ඉහළ නැංවීම සඳහා ප්‍රතිපත්ති පොලී අනුපාතය දුරස්ථ පාලකයක් මෙන් නිසැකයෙන් ක්‍රියා කෙරෙන ආකාරය ආර්ථික විද්‍යා ගුරුවරුන් සහ සිසුන් විසින් විචිත්‍ර ලෙස කටපාඩමින් ඉදිරිපත් කෙරේ. එය විෂය නිර්දේශ සහ විභාගයන් හරහා මූල්‍ය දේව ධර්මයක් ලෙස ඔවුන්ගේ මනසෙහි ස්ථාපනය කොට ඇත
